You Go But Everywhere Still Dey Call You - by Letters From Delight ⁠♡♡

E get some kind pain wey no be cry fit explain. Na the one wey hold your chest like say your breath wan freeze. This one nai break me pass. Death no get respect. E no dey look face, e no dey ask question. E no dey pity small pikin, e no dey fear big man. E just dey waka anyhow, dey pick who e want. And when e pass, e go leave you empty like bottle wey water don finish inside. Sometimes, e no be say the person wey die dey too close, but the hole wey e leave big. Na that silence after everything wey dey loud pass. You go wake up, you go expect say the person still dey, you go wan gist, wan laugh, you go wan call their name, but na air go answer you. Na there you go know say e don go for real. E go be sha! I don see death before, but this one touch another level. This one break me in pieces wey I no sabi how to gather back. E make me fear life small. Because how person go just exist today, full of plans, full of smiles, then tomorrow, nothing? Na just their name, memory, and voice wey no dey echo again 💔. Sometimes I dey reason say maybe death no wicked, maybe e just dey do wetin e know. But still, I go ask God, “why this one?” because if God no tell me "why" now, if he tell me after life, wetin I go use the answer do?Because death the pain reach bone. Especially if the person dey close to you. E go be like dream. You go try to move on, but grief no be something wey get finish line. E dey come like breeze . One moment you dey okay, the next one, you don remember again. You fit dey laugh, then suddenly your chest go just freeze. People go talk say time go heal, but dem no talk say the scar go still dey scratch. Sometimes you go dey smile for people make dem no worry, but inside you, you dey bleed small small. You go dey strong, but e still dey hurt. Because when death don touch you close, e go change your way of seeing life. You go begin value silence, value people, value small joy wey you dey overlook before.You go begin dey see everything for life as nothing. <blockquote>Sometimes no be Nigeria we dey fear, na death.</blockquote> This one nai break me pass, because e remind me say we no really get control for this life. We dey plan, we dey dream, we dey pray, but we no fit hold breath for person when time reach.Them say death go touch everybody, but I dey fear make e no touch me now.So now, I just dey tell myself say make I love well, make I forgive quick, make I talk truth, make I live full, make I enjoy the moment. Because tomorrow no get promise. This pain deep, but inside the pain, I still dey see one thing clear, love no dey die. Even if body go, the love wey remain still dey breathe inside memory. Na wetin dey keep me going.

Other insights from Letters From Delight ⁠♡♡

Referral Earning

Points-to-Coupons