MY TWIST OF FATE (prt.1) - by Gift Olabode

My name na Nkiru. If u dey read this thing naw, e mean say u don find my letter.Welcome to my thoughts. Walk with me, leg no go pain u. Abeg carry small chair with you cos you cannot turn back o. 🔪🪓💣 I dey for my village jeje.E get this satellite Wey my neighbour buy. E be like say the name na Gotv. Dat thing sweet me for belle anytime I dey watch am. I even pack go my neighbour house because e get two channel Wey I dey always like well well. Zee World and Rok TV.Zee World love dey sweet me for belle. I like Twist of Fate well well. Na every night dem dey show dat one. Na e I ask myself, na so love sweet and easy?Poor girl go just dey marry rich man anyhow. Twist of Fate na my own story o. Cos dat girl na from the village and the man Wey be her lover na one rich man from the city. Deir love sweet. Eiiii. See mansion for inside film. Na God go punish Emeka oo. Dat boy na very useless boyfriend. Na me go dey give am money to barb hair, na me go still give am pocket money. Na me e go con dey dump all e frustlations on. For our relationship, na me be pepper, na me be salt, na me be dust bin. Everything na me.Make e con learn from Abi. See as e dey pamper Pragya. I don break up with am sa. I need find dis kind love o.My friend Ngozi don commot from village. She talk say her dream na to be a doctor. Me, my own dream na to fall in love with a good man Wey get money. I wan commot this village too.I for go India because their love sweet, but I no get money for aeroplane. So, I go go Lagos. Na Lagos Nollywood love dey happen wella. Ahhh. E get one film Wey I watch for Rok TV Wey sweet me well well. I don forget the name. But the girl na poor girl. Very poor. She con dey do Sakara for rich man. She even slap am when e come her house. She talk say he be play boy. The man no even touch am. E talk say he like say she be expensive babe. Haaa. Last last dem marry. You too dey see am abi?Go wear glasses if you no see am o. Me I dey commot this village by next month o.I don call my aunty Wey dey Lagos. She don agree say make I come.I don dey cook food for people and collect money so I go use am buy fine clothes for Lagos. No worry.I don practice Nollywood wella. Sebi na to slap rich man and pour water for their body…I go do am.If love no find me, I go find love myself. Lagos, wait for me. Nkiru is coming. ✍️Gift Olabode

Other insights from Gift Olabode

Contributor Points

Points-to-Coupons

Referral Earning